Ný leið í kennslubókaútgáfu

19.05.2017 | Stutt

Ný leið í kennslubókaútgáfu

Tveir íslenskir útgefendur, ásamt útgefendum í Færeyjum og á Grænlandi, taka nú þátt í tilraunaverkefni með dönsku kennslubókaútgáfunni Systime. Í aprílbyrjun var haldinn kynningarfundur og námskeið um verkefnið sem miðar að því að kanna hvernig þessi danska útgáfuleið henti í löndunum þremur.

Yfir 50 þúsund kennarar og 450 þúsund nemendur í Danmörku nota nú kennslubækur í gegnum kerfi Systime sem hefur verið í þróun síðan 2008. Kerfi þeirra er gagnagrunnur sem keyrt getur út kennslugögn hvort heldur sem margmiðlunarbækur í vafra, hefðbundnar rafbækur, pdf-skjöl eða sem prentaðar bækur. Eitt útilokar ekki annað því efnið er sett upp með alla möguleikana í huga. Enska heitið yfir þetta útgáfuform er Single Source Publishing, eða SSP.

Skólafólk í Danmörku hefur tekið þessum möguleika vel. Yfir 65 skólar eru í áskrift hjá Systime og nota aðeins kennslubækur þaðan, en fjölmargir skólar kaupa einnig staka titla af fyrirtækinu.
Systime hefur þegar gefið út 350 kennslubækur með þessum hætti en hátt í 100 titlar til viðbótar eru í vinnslu hjá þeim. Höfundar á þeirra vegum eru orðnir átta hundruð.

Von er á fyrstu íslensku kennslubókunum sem settar eru upp í Systime-kerfinu strax í haust hjá Forlaginu og IÐNÚ. „Ef þessi útgáfuleið hentar íslensku skólafólki vel gæti það leyst fjölmörg vandamál sem blasa við kennslubókaútgáfunni á öllum skólastigum,“ segir Laufey Leifsdóttir, ritstjóri hjá Forlaginu, sem fylgt hefur samstarfsverkefninu frá því það fór af stað árið 2015. „Við erum virkilega spennt að sjá hvernig viðtökurnar verða þegar bækurnar fara í loftið. Þetta kerfi hefur marga kosti, ekki síst að það verndar höfundarrétt námsefnisins og gerir okkur kleift að uppfæra og endurraða efninu og sérsníða það fyrir mismunandi notkun. En þessi leið gerir líka meiri kröfur til bæði útgefenda og höfunda. Það er bara ein leið til að komast að því hvernig þetta virkar hér á landi og það er að prófa.“

Nánari upplýsingar um kerfi Systime má finna á https://systime.dk.

Viðfangsefni: Rafræn útgáfa, Námsbækur