Hólmfríður nýr formaður STÍL

30.05.2019 | Málfríður

Hólmfríður nýr formaður STÍL

Hólmfríður Garðarsdóttir hefur tekið við formennsku í STÍL – samtökum tungumálakennara á Íslandi. Fráfarandi formaður er Petrína Rós Karlsdóttir.

Hólmfríður er prófessor við Deild tungumála og menningar á Hugvísindasviði Háskóla Íslands. Hún er starfandi vísindamaður innan raða Stofnunar Vigdísar Finnbogadóttur í erlendum tungumálum. Hólmfríður hefur kennt spænsku á öllum skólastigum (utan grunnskólastigs) um árabil og tekið virkan þátt í starfsemi Félags spænskukennara.

Hólmfríður lauk doktorsprófi frá Texasháskóla í Austin árið 2001 og hefur flutt erindi og fyrirlestra á ráðstefnum víða um heim, auk þess að þýða og gefa út fjölda fræðigreina á spænsku, ensku og íslensku.

Fram undan hjá STÍL er sumarnámskeið, ætlað öllum tungumálakennurum og auk þess stendur yfir undirbúningur alþjóðlegrar ráðstefnu NBR sem verður haldin í Reykjavík dagana 11. og 12. júní 2020 og ber yfirskriftina „Framtíð tungumála“.